இலங்கைக்கு எதிரான இந்திய ஒருதின அணி by CricketArchive

---

Event:

India in Sri Lanka 2008

---

DateLine: 7th August 2008

 

மும்பை, ஆகஸ்டு, 7: இலங்கையில் துவங்கவிருக்கும் ஒருதினத்தொடருக்கான இந்திய அணி தேர்வு இன்று மும்பையில் நடை பெற்றது. இந்திய கிரிக்கெட் அணியின் மும்மூர்த்திகளில் சச்சின் இடம் பெற்றுள்ளார். இலங்கைக்கு எதிரான இரண்டு டெஸ்ட் போட்டிகளில் சிறப்பாக விளையாடாத சௌவுரவ் கங்குலி, ராகுல் திராவிட் நீக்கப்பட்டுள்ளனர்.

 

இலங்கைக்கு சுற்றுப்பயணம் செல்லும் இந்திய அணி 3 டெஸ்ட் மற்றும் 5 ஒருநாள் போட்டி கொண்ட தொடரில் ஆடவிருக்கிறது. இரு அணிகளும் மோதும் மூன்றாவது டெஸ்ட் போட்டி நாளை இலங்கையில் துவங்குகிறது. இந்நிலையில் வரும் 18-ம் தேதி முதல் துவங்க இருக்கும் ஒரு தினத் தொடரில் விளையாடவுள்ள ஒருதின அணியை வெங்சர்க்கார் தலைமையிலான தேர்வுக்குழு இன்று மும்பையில் தேர்வு செய்தது.

 

காயம் காரணமாக உடற்தகுதி பிரச்னையால் சமீபத்தில் நடைபெற்ற ஓருதின தொடர்களில் இருந்து விலகிக்கொண்ட சச்சின் தெண்டுல்கர், டெஸ்ட் தொடரைத் தொடர்ந்து, ஒருதினத் தொடரிலும் இடம்பிடித்துள்ளார். புதிய வரவாக 19 வயதிற்குள்பட்ட இந்திய அணியின் கேப்டனான விராட் கோஹ்லியும் சேர்க்கப்பட்டுள்ளார்.

 

இந்திய அணி விவரம்: மஹேந்திரசிங் தோனி (கேப்டன்), சச்சின் தெண்டுல்கர், வீரேந்திர ஷேவாக், கௌதம் காம்பிர், யுவராஜ்சிங் (துணை கேப்டன்), சுரேஷ் ரெய்னா, ரோஹித் சர்மா, விராட் கோஹ்லி, பார்த்தீவ் படேல் (விக்கெட் கீப்பர்), இர்பான் பதான், பிரவீண் குமார், ஜாகீர் கான், ஹர்பஜன் சிங், பிரக்யான் ஓஜா, முனாப் படேல், ஆர்.பி.சிங்.

 

இலங்கையுடன் மோத உள்ள 5 ஒருதினப்போட்டிகளின் விவரம்: முதல் போட்டி ஆகஸ்டு 18-ஆம் தேதியும், 2-வது போட்டி ஆகஸ்டு 20-ஆம் தேதியும் நடைபெறுகிறது. இந்த இரண்டு போட்டிகளும் தம்புல்லா மைதானத்தில் பகல் ஆட்டமாக நடைபெற உள்ளது.

 

3-வது போட்டி ஆகஸ்டு 24-ஆம் தேதியும், 4-வது போட்டி ஆகஸ்டு 26-ஆம் தேதியும், 5-வது போட்டி ஆகஸ்டு 28-ஆம் தேதியும் நடைபெறுகிறது. இந்த கடைசி மூன்று போட்டிகளும் கொழும்புவில் உள்ள பிரேமதேசா மைதானத்தில் பகலிரவு ஆட்டமாக நடைபெற உள்ளது.